還未有互聯網的 60年代，藝術家 Andy Warhol已預言，未來每個人都會有 15分鐘成名機會。今天，只要你夠爆敢玩命，哪管你是霸氣阿嬋還是奀模老竇，要上位見報何須幹一番大事業。有位中年工程師，最近將一段 rap片放上 YouTube，「財政司司長你好嗎，我個名叫做 Dr.King......」網友說他是唐白虎數白欖，贈他收皮二字。他說他不是 MC JIN，下次會做得更好。立志上位，更定下二十年表演計劃，誓要打破大眾對工程師的固有形象，是他太瘋癲，還是他人看不穿？
「你好！我係黃敬！」接過名片，抬頭寫着「麥斯迪埃．黃敬」，記者才疏學淺，四字複姓只想到愛新覺羅，「自己改嘅，因為我搞嘅發展顧問公司叫 MSDI，譯音就係呢四個字，係咪好搶眼令你留得低印象？」下月將於理大表演四場棟篤笑，演繹升呢秘笈「際遇由我創」，教工程師們如何在 40歲前賺一千萬，「我嘅棟篤笑笑中有淚，係參考過黃子華、詹瑞文嘅表演，其實笑話唔使好笑，最緊要帶到觀眾跟你笑。」
不只棟篤笑， Dr.King最近還苦學拉丁舞、口琴、唱歌，表演大計橫跨 20年，「諗住做 18區巡迴表演」。積極上位不但為滿足表演慾，也意圖將工程師守舊形象打碎，「好多人仍然覺得工程師死板、出入地盤好污糟，我只係想話畀你聽，我哋都係專業人士，你睇我一啲都唔污糟，因為我會帶三套衫落地盤換」。不擔心別人嘲笑？「連前程都唔使點擔心，仲有咩好驚？我唔一定成功，不過應該唔會失敗。」
這句說話，是他半生座右銘。來自客家窮鄉， 11歲隨祖母來港定居，屋邨仔靠雙手穿膠花養家，兼職太多，學業成績滑落，險進不了大學，「本來想讀傳理系做記者，結果成績麻麻，當年掹車邊先入到港大工程系」。畢業後步步高升， 25歲之齡管理百人工程公司，講師顧問老闆通通做過。
一臉自信滿滿，但人生至今遇過兩次滑鐵盧，「兩鋪都係輸身家」，大學時代靠做補習社及電腦公司賺到第一桶金，學人炒孖展，一鋪清袋，「以後發誓唔敢再賭錢」；近日公司投資又失利，不過人到中年心境化，「夠食夠住就可以嘞」。
父母離異沒令他孤僻，反而愛說話。黃敬說，祖母對他影響大，「 50年代佢自己起屋，家 80歲人同個孫一齊學英文 ABC。」哎呀弟妹眾多，最少的只有 3歲，讓他更重視家人，「 10年前已經立咗遺囑，每個家人都希望照顧到。」棟篤笑工程師磨拳擦掌，希望其表演能鼓舞年輕人及業界，別忘了自己的專業，以及凡事皆可行的簡單信念。
記者 夏志禮
Link
